سینەماکاری کورد "بەھمەن قوبادی" لە پەیامی نەورۆزی خۆیدا بۆ خەڵکی کوردستان ڕایگەیاند: لەوباوەڕەدام کە بەھاری ئەمساڵ، دەسپێکێکی جیاواز دەبێت بۆ نەتەوەی کورد.

سینەماکاری ناودار و بەئەزموونی کورد "بەھمەن قوبادی" بە بۆنەی ھاتنی جەژنی نەتەوەیی نەورۆز، پەیامێک ئاراستی خەڵکی کوردستان لە سەرتاسەری دنیادا دەکات، کە دەقەکەی لە خوارەوەدا ھاتووە:

ھەر ساڵێک و ھەر بەھارێک دەسپێکێکی دووبارەن بۆمان و گۆڕینی چوار وەرزی ساڵ، بە مانای گۆڕانکاریی دووبارەن لە ژیانی مرۆڤدا و ھاوکات لەگەڵ ئەم گۆڕانکارییە، دەبێت بەرەوپێشەوە بڕۆین و لە تەواوی لایەنە جۆراوجۆرەکانی ژیاندا گۆڕانکاریی بەدیبێنین.

ھیوادارم بەھاری ئەمساڵ دەسپێکێکی نوێی بێت و ھیچ کاتێک بۆ گۆڕانکاریی و ئاڵووگۆڕیی فیکریی درەنگ نییە. باشتر وایە کتێب و کتێب خوێندنەوە بە ھەڤاڵ و ھاوڕێی خۆمان دابنێین و لە فێربوونی زیاتریی زمانێکی نێودەوڵەتییدا کەمتەرخەمی نەکەین تاکوو دەرگایەک بێت بۆ فێربوون و بەدەستھێنانی ئەزموونی نەتەوەکانی دیکە و بەکارھێنانیان لە ژیانی خۆماندا بە باشترین شێوازیی پێویست.

تۆڕە کۆمەڵایەتییەکانیش ڕۆڵێکی گرینگیان لە گۆڕانکارییە کۆمەڵایەتییەکاندا بینیوە، بەڵام دەبێت بە وشیاریی و ڕوانینێکی پۆزێتیڤەوە سەیریان بکەین.

پەروەردەکردنی منداڵەکانمان و گرینگیدان بە سەرھەڵدانی فیکریی و سەلامەتیی و تەندروستیی و ھەروەھا خواردنیان، ئەرکی ئێمەیە بۆ گەیشتن بە کۆمەڵگایەکی پێشکەوتوو.

ھەوڵەکانی خۆمان بۆ ئەم گۆڕانکاریانە، بخەینەگڕ و لە خۆمان و ماڵەکانمانەوە دەستپێبکەین و ھەروەھا لەوباوەڕەدام کە بەھاری ئەمساڵ، دەبێت دەسپێکێکی جیاواز بۆ نەتەوەی کورد بێت و بە ورەیەکی بەرزەوە بۆ بەرەوپێشبردنیی ئامانجەکانمان تێبکۆشین.

بۆ زانیاریی زیاتر:

Facebook. com/ bahman. ghobadi
Twitter. com/bahman_ghobadi
Instagram/bahman_ghobadi