(2) ..

له‌ کۆنفرانسه‌ ڕۆژنامه‌وانییه‌که‌ی دوای ئیمزاکردنی یاسای هه‌ڵبژاردنی عێراقدا، که‌ هاوپه‌یمانیی کوردستان له‌ژێر فشاری ئه‌مریکا و نه‌ته‌وه‌یه‌کگرتووه‌کاندا، ئیمزای کرد، سه‌رۆکی تازه‌ی په‌رله‌مانی کوردستان که‌مال که‌رکووکی جه‌ختی له‌سه‌ر ئه‌وه‌ کرده‌وه‌ که‌ ده‌بێ له‌مه‌ولا ته‌نسیق له‌ نێوان لایه‌نه‌ کوردییه‌کاندا هه‌بێ، بۆ ئه‌وه‌ی به‌ هێزێکی یه‌کگرتووه‌وه‌ ڕووبه‌ڕووی ڕووداو و پێشهاته‌کان ببنه‌وه‌.. بۆ نموونه‌، گله‌ییی له‌وه‌ ده‌کرد که‌ ته‌نسیق له‌نێوان هه‌ولێر و وه‌زیره‌ کورده‌کانی به‌غدا نییه‌.. هه‌ڵبه‌ت ئه‌م ئامۆژگاری و داوایانه‌‌، دوای ئه‌و نه‌زیلۆکانه‌ بوون که‌ تیشکیان ده‌خسته‌ سه‌ر ئه‌و فێڵه‌ی گوایه‌ له‌ به‌غدا لێیان کراوه‌، وه‌ک بڵێی کورد تازه‌ سیاسه‌ت ده‌که‌ن و هێشتا چه‌چه‌پلن!

ئه‌و بڕوبیانووه‌ی سه‌رۆکی په‌رله‌مان، وێڕای 50 ساڵ له ‌وانه‌ی دانوستان و 20 ساڵ له‌ ئه‌زموونی حوکمڕانیدا، هاوکات دوای ئه‌و خۆبه‌ده‌سته‌وه‌دان و خۆهاوێشتنه‌ باوه‌شی ویست و حه‌زی ناحه‌زانی کورد له‌ په‌رله‌مانی عێراقدا، به‌رانبه‌ر چاکه‌ی ته‌له‌فۆنێکی باڕاک ئۆباما و نامه‌یه‌کی سه‌ره‌خۆشیی کۆشکی سپی، که‌ فه‌ریکه‌ یاسازانێکیش ده‌زانێت که‌ ئه‌م هه‌ڵوێستانه‌ له‌ بازاڕی سیاسه‌تدا پووڵێکی قه‌ڵپ ناهێنن.. ئه‌رێ، ئه‌و شێروڕێوی هێنانه‌وه‌یه‌ی که‌مال که‌رکووکی، هیچ په‌یوه‌ندییه‌کی به‌ نه‌بوونی ته‌نسیق و کۆکی نه‌بووه‌ له‌نێوان لایه‌نه‌ کوردییه‌کانی نێو په‌رله‌ماندا. بگره‌ له‌ مێژووی عێراقدا ڕووی نه‌داوه‌ کوردانی په‌رله‌مانتار ئاوا یه‌کده‌نگ، یه‌کڕا و یه‌کهه‌ڵوێست کار و خه‌بات بکه‌ن، شایه‌دی موعته‌به‌ریشمان ئه‌و سه‌رکه‌وتنه‌ بوو که‌ له‌ جه‌وله‌ی یه‌که‌مدا به‌ ده‌ستیان هێنا، به‌جۆرێک پارێزگاری موسڵی ئاوا پرزه‌بڕ و بێهیوا کرد؛ داوای خۆپیشاندانی کرد له‌ خه‌ڵکه‌که‌.

ئه‌ی هه‌ر ته‌نسیقه‌که‌ی به‌رایی نه‌بوو که ‌وای کرد جگه‌ له‌ یه‌کگرتوو که‌ پێشتر به‌یانێکی ده‌رکردبوو، هاوکات چه‌ند ئه‌ندامی خودی هاوپه‌یمانیی کوردستانیش ده‌نگ نه‌ده‌ن. ؟ یه‌ک له‌وان عه‌بدولخالیق زه‌نگه‌نه‌ که‌ له‌ لێدوانێکدا سه‌باره‌ت به‌ به‌ڵێنی زاره‌کیی زلهێزان و مولابه‌ساتی ده‌نگدانه‌که‌ وتبووی: " به ‌بۆچونی من ئه‌و به‌ڵێنانه قسه‌ی ره‌سمی نین، ‌پێشم وایه ده‌نگدان له‌سه‌ر ئه‌و یاسایه له لایه‌ن هاوپه‌یمانییه‌وه درێژه‌پێده‌ری ئه‌و کارانه‌یه‌ که‌ كورد‌ له ڕابردوودا کردوونی، به‌ ‌ڕازیبوون به ‌دواخستنی مادده‌ی140 و ‌هێنانه‌کایه‌ی‌ مادده‌ی 23.. من خۆم كه‌سێكی كه‌ركووكیم، بۆیه‌ یاسایه‌ك په‌سند ناكه‌م كه كه‌سانێك بكاته خاوه‌ن ماف له كه‌ركوك که‌ ئه‌نفال و ده‌ربه‌ده‌ریان كردین.. من ‌وه‌ك كه‌ركوكییه‌ك موعاناتی زۆرم بینیوه.. به‌گشتی تێبینیم له‌سه‌ر یاساكه هه‌یه، بۆیه هه‌ركه‌س پیرۆزبایی ده‌كات كه‌یفی خۆیه‌تی، من وه‌ك خۆم پیرۆزبایی ناكه‌م.. ‌پێشم وایه جۆرێك له بارودۆخی تایبه‌ت له ‌دوا ساته‌كانی دانوسانی لایه‌نه‌كان هات به‌سه‌ر وه‌فدی كوردا، ده‌نا ئه‌و یاسایه ‌هیچ له به‌رژه‌وه‌ندیی كوردا نیه و ‌ئه‌و ته‌نازولاتانه‌ی ‌كراون گیروگرفتی زۆر دروست ده‌که‌ن ". ته‌نانه‌ت بڕیارده‌ری فراکسیۆنی هاوپه‌یمانیی کوردستان سیروان زه‌هاوی له‌ دیمانه‌یه‌کدا ده‌ڵێت: " هۆی ده‌نگنه‌دانی من به‌ یاساکه‌، ئه‌وه‌یه، بڕوام به‌ جێبه‌جێکردنی به‌ڵێنه‌کانی ئه‌مریکا و یوئێن نییه‌"

ته‌نسیقی کورد، ئه‌مجاره‌، له‌‌نێوخۆدا، هیچ عه‌یبی نه‌بوو، به‌ڵکوو لاوازی و بێهێزیی سه‌رکردایه‌تیی کورد و نه‌گه‌ڕانه‌وه‌ی بۆ ئیڕاده‌ی خه‌ڵکی کوردستان، سه‌رکزی کردن، ڕێک به‌پێچه‌وانه‌ی تاریق هاشمی که‌ تا ئاخر چرکه‌ سازشی نه‌کرد.. ئه‌م بێته‌گبیرییه‌ش وای کرد، کورد، به‌ ئیمزای ڕۆڵه‌کانی، دووچاری گه‌وره‌ترین هه‌ره‌سی مێژوویی ببێت، پاش کاره‌ساته‌که‌ی 1975.. هه‌ڵبه‌ت ئاکامه‌کانی ئه‌م بێسه‌روبه‌رییه‌ش، دوای هه‌ڵبژاردنه‌کانی1010ی عێراق سه‌ر هه‌ڵده‌ده‌ن، ئه‌گه‌ر هه‌ر له‌ ئێسته‌وه، گه‌رماوگه‌رم، به‌ به‌رنامه‌یه‌کی نوێ و تۆکمه‌ و به‌ به‌ژداریی هه‌موو هێز و لایه‌نه‌کانی کوردستان‌؛ ده‌رمانی بۆ نه‌گیرێته‌وه‌.

وه‌ستان به‌دیار کیشه‌ و کاره‌ساتانه‌وه‌، ده‌ست نادات. چۆکشلکردن و پاساوهێنانه‌وه‌، به‌ده‌رد ناخوات. چوون بۆ واشنتۆن بۆ کۆبوونه‌وه‌ و دیداری گه‌وره‌به‌رپرسان، له‌ وره‌ی نه‌یارانی کورد له‌ په‌رله‌مانی عێراقدا، به‌ هه‌ڵکوتانه‌ سه‌ر کورد و داماڵین و دامراندنی مه‌سه‌له‌که‌ی، که‌م ناکاته‌وه‌، بگره‌ سوورتریان ده‌کات. جگه‌ له‌وه‌ی له‌م ئانوساته‌شدا له‌ نێو کۆمه‌ڵگه‌ی نێو عێراق و عه‌ره‌بیدا، سه‌باره‌ت به‌ بوونی داگیرکه‌ر، زێتر پشتگیرییان لێ ده‌کرێت.

 نازانم کام سیاسه‌تمه‌دار گیرابوویه‌وه‌، به‌وه‌ی، به‌ر له‌ ده‌سپێکردنه‌وه‌ی شه‌ڕ له‌نێوان حکوومه‌تی عێراق و کوردا له‌ 1974دا، وه‌فدێکی کوردی چووبووه‌ ئه‌مریکا بۆ ئه‌وه‌ی سکاڵای خۆی پێشکه‌ش به ‌وان بکا و بنزمانی ئه‌مریکییه‌کان بخوێنێته‌وه‌، ئه‌وانیش وتبوویان ئێمه‌ که‌ تا ئێسته‌ هاو سۆزی ئێوه‌ بووین، ته‌نانه‌ت بۆ ئه‌وه‌ بووه‌ سه‌دداممان بۆ لاواز بکه‌ن، باقییه‌که‌ له‌ ئه‌ستۆی خۆتانایه‌. !

13/12/2009

ئەم پۆستە ئەلیکترۆنیە لەلایەن ئامێرئ سپامەوەیە. جاڤاسکریپت دەبێت چلاک بکەی بۆ بینینی, you need JavaScript enabled to view it

ئه‌و بابه‌تانه‌ی له‌ کوردستان نێت دا بڵاوده‌کرێنه‌وه‌، بیروبۆچوونی خاوه‌نه‌کانیانه‌، کوردستان نێت لێی به‌رپرسیار نییه‌.