زه‌هایمه‌ر كه ئه‌لزه‌هایمه‌ریشی پێده‌ووترێت باوترین جۆری نه‌خۆشیی خه‌ڵه‌فانه. زاراوه‌ی خه‌ڵه‌فان بریتییه له‌و نه‌خۆشییه ده‌ماخییانه‌ی په‌یوه‌ندییان به له‌ده‌ستدانی یادگاو كه‌مبونه‌وه‌ی توانا زانیارییه‌كانه‌وه هه‌یه. ئه‌مانه‌ی خواره‌وه چه‌ند زانیارییه‌كی سه‌رنجڕاكێشن سه‌باره‌ت به زه‌هایمه‌ر:
· له‌ئێستادا زیاتر له شه‌ش ملیۆن هاوڵاتیی ئه‌مه‌ریكی به زه‌هایمه‌ره‌وه ژیان به‌سه‌رده‌به‌ن. پێشبینیده‌كرێت به هاتنی ساڵی 2050 ئه‌م ژماره‌یه بگاته 13 ملیۆن.
· له‌ویلایه‌ته یه‌كگرتووه‌كانی ئه‌مه‌ریكا، له‌سه‌رده‌می په‌تای كۆڤید19دا مردنی توشبوانی زه‌هایمه‌رو خه‌ڵه‌فان به‌گشتی، به‌ڕێژه‌ی له‌سه‌دا 16 زیادیكردووه.
· له‌هه‌موو سێ به‌ساڵاچویه‌كی ویلایه‌ته یه‌كگرتووه‌كانی ئه‌مه‌ریكا، یه‌كێكیان به زه‌هایمه‌ر یان جۆرێكی تر له‌نه‌خۆشیی خه‌ڵه‌فان، كۆچی دواییده‌كات. واته ژماره‌ی قوربانییه‌كانی ئه‌م نه‌خۆشییانه زیاتره له هی قوربانیانی شێرپه‌نجه‌ی مه‌مك و پرۆستات پێكه‌وه.
· ته‌نها له‌ساڵی 2021، تێچووی نه‌خۆشی زه‌هایمه‌رو جۆره‌كانی تری خه‌ڵه‌فان له‌سه‌ر ویلایه‌ته یه‌كگرتووه‌كانی ئه‌مه‌ریكا، 355 ملیار دۆلار بووه. به‌هاتنی ساڵی 2050، ده‌كرێ ئه‌م بڕه پاره‌یه بۆ یه‌ك ترلیۆن و 100 ملیار به‌رزببێته‌وه.
· زیاتر له 11 ملیۆن هاوڵاتی ئه‌مه‌ریكی چاودێریی بێبه‌رامبه‌ر بۆ توشبوانی زه‌هایمه‌رو نه‌خۆشییه‌كانی تری خه‌ڵه‌فان دابینده‌كه‌ن. ئه‌م چاودێرانه 15 ملیارو 300 ملیۆن سه‌عات خزمه‌ت پێشكه‌ش به‌و نه‌خۆشانه ده‌كه‌ن و به‌های ئه‌م خزمه‌تانه‌ش نزیكه‌ی 257 ملیار دۆلاره.
· له‌هه‌موو 10 هاوڵاتییه‌كی ئه‌مه‌ریكیی به‌ڕه‌گه‌ز ئیسپانی، ته‌نها سیانیان له‌و بڕوایه‌دان كه هێنده ته‌مه‌نیان درێژده‌بێت كه توشی نه‌خۆشییه‌كانی خه‌ڵه‌فان ببن.
· له‌نێوان ساڵی 2000 بۆ 2019، مردن به‌هۆی نه‌خۆشییه‌كانی دڵ به‌ڕێژه‌ی له‌سه‌دا 7.3 كه‌میكردووه، به‌ڵام به‌هۆی زه‌هایمه‌ره‌وه به‌ڕێژه‌ی له‌سه‌دا 145 زیادیكردووه.
· له‌هه‌موو سێ توشبویه‌كی زه‌هایمه‌ر له‌ویلایه‌ته یه‌كگرتووه‌كانی ئه‌مه‌ریكا، نزیكه‌ی دوانیان ژنن.
· ناوی زه‌هایمه‌ر له‌و پزیشكه‌وه وه‌رگیراوه كه بۆ یه‌كه‌مینجار نه‌خۆشییه‌كه‌ی ناساندووه. بۆ یه‌كه‌مینجار ئه‌م نه‌خۆشییه له‌ساڵی 1906 له‌لایه‌ن پزیشكێكی ئه‌ڵمانییه‌وه به‌ناوی ئه‌لریس ئه‌لزهایمه‌ر، دۆزراوه‌ته‌وه.
· تائێستا هیچ چاره‌سه‌رێكی ته‌واوه‌تی بۆ زه‌هایمه‌ر بونی نیه. به‌ڵام ده‌توانرێت په‌ره‌سه‌ندنی نه‌خۆشییه‌كه، خاوبكرێت.